Español 
Bi puntu baino gehiago balio dituen garaipena lortu zuen Hierros Servando Eibar taldeak larunbatean Uharte nafarraren aurka (23-22). Lehenengo lau sailkatuen artean, talde bakarra izan zen eibartarra puntuak eskuratu zituena, laugarren denari irabazi eta gero. Bai lehena den Helvetia Anaitasuna eta baita hirugarrena den Ereintza Aguaplastek ere, porrota jasan zuten jokatu zituzten neurketetan. 42 puntu dituzte orain armaginek, 8 geratzen dira jokoan eta 7ra dute talde Errenteriarra, datorren asteburuko aurkaria, hain zuzen ere. Geratzen diren neurketetan puntu bakarra aterata bigarren postu eta igoera faserako sailkapena lortuko lukete eibartarrek.
Dena den, Uharteren aurkako partida nahiko gorabeheratsua suertatu zen. Lasai aritzeko aldea lortu zuten armaginek norgehiagokan, hala eta guztiz, galtzeko zorian ere egon zen gure taldea. Ez zuen ondo hasi lehia, baina 7-1eko partzialari esker markagailuan agintea lortu eta alde nabarmenarekin egon ziren 40. minutu arte. Diferentzia handiena lortu eta berehala, beherakada itzela izan zuten etxekoek. 7 goleko errenta ezerezean geratu zen bukaerarako minutu gutxiren faltan. Baina duten adorea atera eta berdinketa eusteaz gain, azken erasoan ezker hegalera egindako pase bati esker, Iker Eizagirre bakarrik geratu zen segundo gutxiren faltan eta ez zuen barkatu, garaipena Ipuruan utziz. Iker bera eta Lander Casado izan ziren taldeko goleatzailerik onenak bakoitza 6 golekin, norgehiagokan aldiz, Pablo Gutierrez kanpotarra izan zen erasoan finen ibili zena 8rekin.
Gauzak horrela, puntu batek nahikoa dio Hierros Servando taldeari bigarren postuari eusteko eta igoera fasera sartzeko. Erronka erraza ematen duen arren, armaginak ezin dira fidatu eta datorren asteburuan bertan ahaleginduko dira puntu hori eskuratzen. Hala eta guztiz, Ipuruan ere pare bat partida geratzen zaizkio jomugara heltzeko.
Zortzigarren garaipena jarraian Hierros Servando Eibar taldeak larunbatean Urdulizen lortu zuena (26-32). Goitik behera nagusitu ziren eibartarrak, ia partidu osoan aurretik markagailuan, zoragarri eraman zuten aginte-makila. Taldearen momenturik ahulenean bizkaitarrek berdintzea lortu zuten arren, suspertu eta aldea handituz bi puntuak ziurtatu zuten armaginek. Bigarren postuan dira orain 35rekin, Helvetia Anaitasunak atzeratutako neurketa bat irabazi baitzuen eibartarrak aurreratuz. Hala eta guztiz, gipuzkoarren orain arteko lana goraipatzekoa da ezbairik gabe eta geratzen diren bederatzi jardunalditan lidergoa berreskuratzen gogor saiatuko dira gure jokalariak. “Jardunaldiak pasa ahala ikusten ari gara jokalari hauen seriotasun, konpromisoa eta jarrera ezin hobea, eta horrela, goian bukatzeko geneukan helburua hobetu dezakegu igoera fasera sailkatuz”, dio Fernandok. Asteburuko maila erakutsita posible da helmugara heltzea.
Lehen zati nahiko gora beheretsua izan zen, eibartarrak markagailuan aldea zabaldu nahian, kolpe bakoitzean bikainki suspertzen ziren etxekoak. Atsedenaldira diferentzia handiarekin iritsiko zirela ematen zuenean, urduliztarrak berriz esnatu eta norgehiagoka parekatu zuten. “Lehen zati irregularra jokatu genuen, bost goleko aldea ere edukitzea lortu genuen arren, hurbiltzea lortu zuten atsedenaldirako. Hori bai, bigarren zati sendo bati esker berdintasun hori apurtzen joan ginen”. Horrela, lehen 30 minutuetako akatsak zuzendu eta bi taldeetan dagoen maila pistan ikusten hasi zen, hori bai, pixka bat kostatu zitzaien arren, armaginek duten kalitatea agerian jarri zuten bigarren zati amaiera zoragarri bat burutuz. Jokalari guztiak izugarri aritu ziren. Jon Barruetabeña nabarmentzea nahiko nuke 9 gol egin zituen eta, horretaz gain, denboraldi bikaina burutzen ari da. Mikel Zuluetaren errekuperatzea ere bide onetik doa, geroz eta minutu gehiago jolastuz, oso ondo aritu zen larunbatean”. Fernandok esan bezala Jon izan zen lehiako goleatzailerik onena.
Hierros Servando Eibarren porrot mingarria Uharten (22-15). Jokalari eibartarrek entrenamendu falta asko nabari zuten eta neurketan sartzen ahalegindu ziren arren, erasoko errendimendu baxuak aukera gabe utzi zuen taldea. Izan zituzten baja garrantzitsuak ere bere garrantzia izan zuten. Lander Casado eta Mikel Zuloaga adibidez, ez ziren norgehiagokan egon, aurrean umezurtz utziz taldea. Ez ziren bakarrak izan: “Gure goleatzaileen eta Uriarteren bajek, entrenamendu faltak gehituta, atzean sendoago eta aurrean zorrotzago egotera behartzen zigun Uharteren kontra”, aitortu zuen Fernando entrenatzaileak. Nafarrek aldiz, bi puntuak poltsikoratu zituzten defentsa gogor bati esker. “Egia esanda atzealdean ez ginen ondo aritu, taktikoki batez ere, Ballesteros gure atezainaren geldituek, gol gehiago jasotzea ekiditu zuten”.
Iosu Longas eta Mikel Etxeberria bilakatu ziren lehiako goleatzailerik nagusienak, sei eta bost golekin hurrenez hurren. Lehenago aipatu bezala, eibartarrak ez ziren fin ibili aurrealdean, hutsegite askorekin, bajek gogorki kolpatuz taldea. “Erasoan ez genuen gol jarioa izan, jaurtiketetan huts asko eginez, 29 hain zuzen ere, baita hiru penalti ere. Horretaz gain, 12 baloi galtzek kondenatu gintuen”. Porrota ez zen albiste txar bakarra izan armaginentzat: “Txarrena ez zen esku hutsik itzultzea, baizik eta Eneko Garetxanak belaunean duen mina, berriz somatu zuela atsedenaldian”. Albiste txar guztien artean, on bat nabarmendu dezakegu, gazteen ekarpena hain zuzen ere. “Jubenilak kantxan ikustea izan zen eguneko albiste on bakarra. Lehen urteko Mikel eta Jokin; baita bigarren urtekoa den Andoni ere”.
Nolanahi ere, lehen postuan jarraitzen du Hierros Servando Eibarrek 15 punturekin. Hori bai, Helvetia Anaitasuna eta Easygas Urduliz puntu bakarrera daude, hiru eta partida bat gutxiago jolastuta hurrenez hurren. Ereintza Aguaplast izango da Ipuruan datorren larunbatean, urte negargarri honetan jokatuko duten azken lehian, baina hori asteburua heltzean…
Hierros Servando Eibar taldeak denboraldiko lehen porrota jasan zuen Easygas Urdulizen aurka Ipuruan (24-26). Atzetik joan ziren markagailuan partida osoan zehar eta ahalegindu ziren arren, bi puntuak Bizkaia aldera joan ziren azkenean: “Merezitako porrota. Hutsegite ugarirekin, jaurtiketetan ez genuen asmatu”, zioen etsita Fernandok. Orain arte, taldeak jokatu duen partidarik eskasena izan zen, baina astia du gauzak zuzentzeko eta hobetzeko, lehen neurketetako mailara itzultzeko.
Lehia hasi aurretik minutu bateko isilunea gorde zen, JD Arrate taldean jokatu zuen lehen atzerritarrarengatik, Žarko Trajković, pasa den astean zendu bai zen Sarajevon. Jokalari eta entrenatzaile paregabea (lehen taldearekin batera debutatu zuen Espainiako maila nagusian), 70garren hamarkadan heldu zen gure herrira, joko aparta erakutsiz. Entrenatzaile moduan lehen taldea berriz maila gorenera igotzea lortu zuen. Horretaz gain, Arrate-Amaña nesken taldea ere entrenatu zuen 90garren hamarkadan, lehen mailarako txartela eskuratuz emakumeekin ere. Bi talde seniorrak maila gorenera igotzeko kapaza izan zen aulkietan, gure eskubaloiaren une gogoangarriak ezbairik gabe. Goian bego.
Larunbateko neurketara itzulita, hasiera kaxkar batek dena zapuztu zion gure taldeari. Lehen laurdenean gol bakarra egin zuten markagailuan eibartarrek eta aldea seikoa zen. “Bi zatiak gaizki hasi genituen, jokoaren alde guztietan, eta horrek markagailuan beti atzetik joatea eragin zigun”. Ala eta guztiz, buelta eman, eta adorea erakutsiz, bi azpitik heldu ziren atsedenaldira armaginak. Neurketan sartuta ziren harren ez zuten buelta ematen asmatu, ez aurrean ezta atzean ere. Pasatako akatsak eginez eta gol errazak jasoz; erasoan aldiz hesi baten kontra jotzen ziren eibartarrak behin eta berriz. Bigarren zatia ildo beretik jarraitu zuen. Eibartarrak, korrontearen kontra berdindu ezinik. Saiatu ziren hurbiltzen gureak, edozein momentutan ratxa on bat iritsiko zela ematen zuen, berdinketaraino eramango zuena taldea, baina ez zen iritsi eta kanpotarrek, errenta ederki kudeatuz, amaierararte eutsiz, garaipena poltsikoratzea lortu zuten. “Sumatu zen erantzuna gure taldearen partetik, baina ez ginen gai izan aurretik ipintzeko eta garaipena azkenean kanpotarrena izan zen”, zioen armaginen entrenatzaileak.
Lander Casado eta Erlantz Fernandez bilakatu ziren norgehiagokako goleatzaile nagusiak 8rekin. Nabarmentzekoa azken honek, Niklas Ramis eta Garikoitz Viguerak , talde osoak sartu zituen 26 goletik, 22, hiruren artean egin zituztela. Lehen postuan jarraitzen du Hierros Servando Eibarrek 9 punturekin. Bigarren sailkatua den Estudio Matmata Zaragoza Ademarrek ere galdu egin zuen larunbatean; eta hirugarren, Easygas Urduliz da; bi jazarleak 6 punturekin dira, hori bai espainiarrak bi neurketa gutxiago jolastu dituzte, bizkaitarrak bat. Datorren asteburuan Dominicos Zaragoza bisitatuko du talde armaginak.
PUNTU BAT IRABAZI, PUNTU BAT GALDU
Hierros Servando Eibarrek puntu bat harramazkatzea lortu zuen azken unean Romo Indaupe taldearen aurka (31-31). Bi aurpegi ezberdin erakutsi zituzten eibartarrek, lehengo zatian liderraren jarrera, atzean fin eta aurrean zorrotz. Bigarrenean aldiz, nahiko herren ibili ziren gureak, gol asko jasoz, kontrarioei aurretik jartzeko aukera emanez. Segundo batzuren faltan hutsartea eskatu zuen Fernandok azken jokaldia prestatzeko, eta ederki prestatu ere. Puntu bat poltsikoratu zuten eibartarrek azken unean, baina entrenatzailea ez zen pozik partidaren amaieran: “Puntua eskuratzea lortu dugu azkenetan, bestetik aldiz, puntua galdu dugu bigarren zati hasiera negargarri bat eta gero; lehian berriro sartzen utzi diegu, geneukan aldea murriztuz”.
Lehen zati bikaina burutu zuten armaginek, esparru guztietan inposatuz. Etxekoak galduta ziren, ligan oraindik jardun gabe, errodaje falta hori mira zuten dudarik gabe. Bost goleko errentarekin heldu zen gure taldea atsedenaldira, ala ere,bigarren zatia bestelakoa izango zen. Erromo suspertu eta aldea murrizten joan zen gutxika gutxika, eibartarrak ez ziren aurre egiteko gai, jokalari gutxi batzuk salbatu dezakegu bigarren zati eskas hartatik: “Bigarren lerroko jokalarien erasoa soilik goraipatuko nuke(hegalak eta euskarria)”, zioen konforme geratu ez zen Fernandok. 13 minutu faltan jarri ziren aurretik lehendabizi bizkaitarrak. Bi goleko aldea ere lortu zuten minutu gutxiren faltan. Gobela kiroldegian ohituta dauden beste amaiera estu bat bizitzera zihoazen bertako guztiak.
Minutu baten faltan berdinketa zen markagailuan eta etxekoak dinamika hobeago batekin zeuden. Ala eta guztiz, armaginak ez zuten nahi neurketa hain errez oparitzea. Hori bai, Erromok ez zuen barkatu bere azken erasoan eta aurretik jarri ziren hamar bat segundoren faltan. Fernandok hutsartea eskatu zuen jarraian, azken jokaldia prestatzeko intentzioarekin. Entrenatzaileak bere lana egin zuen jokaldi eder bat prestatuz, jokalariek zoragarri pistaratu zutena. Mikel Zuloagak, berdinketa lortu zuen, taldekako azken eraso bikainean. Ez zen denbora gehiagorik geratzen. Puntu bat irabazi, puntu bat galdu.
Nola ez, goraipatzekoa behin eta berriz Mikelen lana; norgehiagokako goleatzaile nagusia zortzi golekin. Etxekoen partetik Yailan Hechevarria izan zen finen aritu zena atearen aurrean zazpi golekin guztira. Fernandok argi adierazi bezala, “ez dugu ondo defenditu, ezta zehaztasunez erasotu; ate azpian ez gara ondo aritu gaurkoan, ez gara gai izan arerioa gelditzen”. Jardunaldian jokatu zen neurketa bakarra izan zen, hori dela eta Hierros Servando Eibar taldea lehen postuan jarraitzen du, bigarrenekiko hiru puntuko aldearekin. Hori bai bi partida gehiago jolastuta. Datorren larunbatean Easygas Urdulizen bisita jasotzekotan dira armaginak.
Hierros Servando Eibar taldeak garaipen borrokatua lortu zuen Egia Teila Fabrikaren aurka, gol gutxiko neurketa berdindu batean (22-19). Gainera, puntua lortzeko zorian egon ziren donostiarrak, baina Ruben Fuentes atezainak azken bi erasoak gelditu zituen, bi puntutako saria etxean utziz. Armaginak aldiz, ez zuten barkatu beraien azken jaurtiketetan, errenkadan bigarren garaitia lortuz.
Argi geratu zen hasierako minututan defentsen lehia izango zela eta erritmo geldo batean jokatuko zela neurketa. Etxekoek ezin zuten defentsa itxia zulatu eta aurretik jartzen ziren bakoitzean, donostiarrek berdintzea lortzen zuten. Horrela, hamarna iritsi ziren atsedenaldira,hiriburukoen azken eraso eraginkor bati esker. Hari beretik ekin zuen bigarren zatiak, huts ugari eta gol gutxi. Hala nola, nabarmentzeko datu bat, eibartarren aldetik 11 jokalarik guztira, gutxienez gol bat sartzea lortu zuten.Hori bai, nagusiena Mikel Zuloaga izan zen seirekin. Donostiarren aldetik iazko amaitu gabeko ligan pitxitxigeratu zena, Mikel Royo zazpirekin. Azken eraso eta defentsa eragileei esker laugarren puntua batzeko aukera izan zuten armaginek.
Hierros Servando Eibar Eskubaloiak ezin hobeto hasi du bueltan den liga txapelketa, Asfaltos Redondo Solozabal Navarrete taldea errioxan garaitu eta gero (24-37). Markagailuak erakusten duena baino zailtasun handiagoarekin gailendu ziren eibartarrak. Jardunaldia bukatzeko pare bat neurketa jolasteke dauden arren, armaginak dira ligako lehen liderrak lortu zuten aldeari esker. Lander Casado, armaginen aurtengo fitxaketariko bat nabarmendu zen partidako goleatzaile nagusi bezala 10 golekin. Mikel Zuloagak ez zuen golarekin duen hitzordura falta eta 6 golen egilea izan zen.
Ondo hasi zuten Fernandorenak norgehiagoka hiru goleko aldea lortuz lehendabiziko bost minutuetan. Hala ere, etxekoak suspertu eta berdinketa mantendu zuten lehen zati osoaren zehar. Hori bai, hiru goleko diferentziarekin iritsi ziren eibartarrak atsedenaldira, azkeneko jokaldi oparoei esker. Bigarrena ere ildo beretik jarraitu zuen, armaginek hiru goleko errenta mantendu zuten 40 minutu eta gero. Neurketaren azken herenean, 4-14ko partziala lortuta, garaipena lotu eta Hierros Servando Eibar taldeak lehendabiziko bi puntuak eskuratu zituen.
