PREVIA 22 ENERO

Goi mailako hitzordua hurrengo asteburuan Arrate Eibar Eskubaloiarentzat. Il capo Hondarribia Bidasoaren kantxan jokatuko du talde armaginak igandean goizeko 12etan, Hondarribiko Hondartza kiroldegian, hain zuzen ere. Puntu bakarra galdu dute eibartarrek orain arte eta lehen postuan dira 27rekin. Hirugarren dira kanpotarrak 20rekin eta ezin dugu ahaztu igoera faserako sailkapena lortzeko hautagaietako bat direla. Jokatu dituzten azken bederatzi neurketatik bakarra galdu dute, besteak irabazi, beraz, argi ibili beharko dira gure jokalariak, gainera, lehia bat daukate oraindik jokatzeke.

Ez dute erasoan nabarmentzen den inor, hala eta guztiz, ezin dira eibartarrak fidatu Xabier Barreto, Julen Mugica, Asier Satrustegi edota Mikel Galan moduko jokalariekin. Defentsan sendo aritzen den taldea da, gol gutxien jaso duenetariko bat da eta ez da lan makala izango punturik harramazkatzea Hondarribin. Dena dela, gogotsu kantxaratuko dira armaginak, sailkapenean dagoen aldea handitzeko helburuarekin.

Emakumezkoen Arrate Eibar Eskubaloiak, aldiz, bigarren fasea prestatzen jarraitzen du. Pasa den asteburuan atseden hartu eta gero, Irauli Bosteko taldeari egingo die bisita eibartarrek larunbatean arratsaldeko 20etan, Donostiako Bidebieta kiroldegian jokatuko den lehian. Gertatzen dena gertatzen dela, ezingo dituzte donostiarren aurka lortutako puntuak hurrengo fasera eraman, ez direlako sailkatuko, beste gauza batzuk hobetzeko erabili dezakete neurketa hau: “Sailkapenari begiratuta garrantzi askorik ez duen arren, guretzat garrantzitsua da joko ona berreskuratzeko eta min hartuta egon direnen sentsazio onak indartzeko”, Andoni Perez entrenatzaileak ez du ezer oparitu nahi. Hori bai, ez da fio eta ez dela samurra izango abisatzen du: “Buru belarri irten behar gara eta ezin dugu pentsatu erraz irabaziko dugunik azkenengoak direlako”.

Gure bigarren taldeek ere erronka politak dauzkate datorren asteburuan. Neskek Egia 2ren bisita jasoko duten bitartean, Unibertsitatean larunbatean goizeko 11:45tan, mutilek Usurbilen pistan arituko dira larunbatean arratsaldeko 17:00etan, Usurbilgo Oiardo kiroldegian.

Gogoratu etxean jokatzen dituzten gure taldeen partidak Eibar Eskubaloiaren Youtube kanalean zuzenean ikusgai izango dituzuela. Gainera, bi talde jubenilak, neskak eta mutilak, eta kadete A neskak euskal ligako igoera fasea jokatuko dute hurrengo asteburuan zehar.

• Jubenil neskak Usurbil-Arrate Eibar Eskubaloia OST 19:00 Ipurua
• Jubenil neskak Soleto Bus Basauri-Arrate Eibar Eskubaloia LAR 16:30 Ipurua
• Jubenil neskak Arrate Eibar Eskubaloia-Lacturale Bera Bera IGA 12:00 Ipurua
• Jubenil mutilak Arrate Eibar Eskubaloia-Loyola Indautxu OST 18:00 Urnietako Udal Kiroldegia
• Jubenil mutilak Herreria Bidebieta Bera Bera-Arrate Eibar Eskubaloia LAR 15:45 Jesuitak Kiroldegia
• Jubenil mutilak Arrate Eibar Eskubaloia-Urnieta Guria Jatetxea IGA 11:45 Miguel A. Blanco udal kiroldegia, Ermua.
• Kadete neskak San Adrian B-Arrate Eibar Eskubaloia OST 18:00 Urdaneta Kiroldegia, Loiu   
• Kadete neskak Arrate Eibar Eskubaloia-Aiala ZKE LAR 10:15 Ipurua
• Kadete neskak Urdaneta F-Arrate Eibar Eskubaloia IGA 12:30 Aritzbatalde kiroldegia, Zarautz
• Kadete neskak Sukia Orio-Arrate Eibar Eskubaloia B LAR 16:00 Karela Kiroldegia, Orio