FINALA

Heldu da eguna. Gipuzkoako koparen finala hemen da eta emakumezkoen Mecalbe Eibar Eskubaloia prest da erronkari aurre egiteko. Arerioa Gaurve asesores Elgoibar izango da eta neurketa Lezoko Bekoerrota kiroldegian jokatuko da larunbatean arratsaldeko 19:30etan. Derbia izango dugu finalean, beraz. Bide ezberdinak jarraitu dituzte bi taldeek partidu handira heltzeko. Elgoibartarrek hiru taldetako multzoa bi neurketetan irabazi zuten bitartean, armaginek lauko multzoan hiru partida behar izan zituzten lidertza eskuratzeko. Zurigorriek Egia Kopidin menderatu eta Bera Beraren kontra berdindu ondoren, golaverageari esker poltsikoratu zuten finalerako txartela. Eibartarrek aldiz, Ameztoi Zarautz, Leizaran Lanbroa taberna eta Construcciones Ugarte Aloña Mendi gainditu eta moralez lepo heltzen dira finalera. Esan dezakegu elgoibartarren jokalaririk arriskutsuenak Urbiola ahizpak, Irati eta Nahia, edota Eider Elorza direla, azken honek 8 gol egin zituen azkeneko partida erabakiorrean. Denboraldi bikaina borobiltzera neskak. Animo!!