Bi partida gogor asteburu honetarako

Larunbat honetan, 18:30ean Ipuruan, Mek Eibar Eskubaloia Zilarrezko Dibisioak Helvetia Anaitasuna liderraren aurka jokatuko du, denboraldi osoan puntu bat bakarrik utzita bere nagusitasuna erakutsi duen taldea. Aurrean duten erronkaz jabetuta, etxeko taldeak bere jokoan jarri behar du arreta, eta partida honetarako helburu zehatzak ezarri, txapelketan aurrera egiteko.

Defentsari dagokionez, denboraldian zehar Ipuruan erakutsitako indarra mantendu egin behar da. Baloiaren lapurretak eta atearen geldialdiak aprobetxatzea erabakigarria izango da kontraeraso azkarrak eragiteko eta gol errazak bihurtzeko. Posizio-erasoan, pazientzia bertute bat izango da, Andoni Perezen neskek beti kontrako aterantz jaurtitzeko aukera argiak bilatu beharko dituztelarik.

Irabaztea erronka bat izango da, baina ondo planifikatutako estrategiak gauzatzeak lehiaketan aurrera egiten jarraitzeko behar den bultzada eman diezaieke.

Bestalde, Lehen Mailako taldeak irteera zaila izango du Tarazonaren aurka. Urrunetik jarutitzen duten jokalariekin, hegaleko jokalari azkarrekin eta barneko joko sendoarekin, Tarazonak erronka handia aurkezten dio talde bisitariari.

Tarazonako defentsa-blokeak, altuera, sendotasun eta jarrera bizia ezaugarri dituenak, erronka gehigarri bat planteatzen du. Eibartarrentzat, Ecenarroren hutsuneak baja esanguratsua izaten jarraitzen du, baina Tarazonan emaitza positiboa lortzeko, talde bisitariak ahalik eta gehien estutu beharko du bere burua, bai defentsari dagokionez, bai erasoari dagokionez.