Español 
Somos Eibarren porrot mingarria larunbatean gol bakar baten aldeaz. Gehio merezi izan zuten eibartarrek baina azkeneko minutuetan eginiko hutsek taldea kondenatu zuten. Norgehiagokaren hiru laurdenetan jaun eta jabe izan ziren armaginak baina Tolosa talde trinko bat bezala mantendu zen, hobeago jolasten minutuak joan ahala. Orain bertan, sailkapena oso estu jarri da kanpotarren garaipenarekin. Sei talde dira guztira bi punturen bitartean daudenak; eibartarrak hamabigarren dira 17 punturekin; Zaragozako Dominicos zazpigarren da 19rekin. Horretaz gain, Egia taldeak jardunaldi honetan irabazi eta 13 punturekin jarri da.
Hasiera nahiko alderraia gertatu zen. Ez zuten asmatzen ez batak ez besteak, baina etxekoak izan ziren lehenak abentaila lortzen eta markagailuan aldea handitzen. Lehen zati on bati esker atsedenaldira hiru gol aurretik iritsi ziren armaginak, baina oraindik denbora asko geratzen zen.
Hala ere, bigarren zati parekatu bat eta gero, tolosarrak berdintzea eta baita aurretik jartzea lortuz batera, ez zioten aurkariari berriz aurreratzen utzi. Hamabost minutu baino gutxiago falta zirenean aurreratu ziren bukaeraraino. Oso zaila egiten zaigu jokalari bakar batekin geratzea, hori dela eta Tolosa talde osoa goraipatzekotan gaude. Sailkapenean erakusten duten baino sendoago azaldu ziren Ipuruan. Fernandoren mutilen artean Axier Gisasolaren lana izan zen aipagarriena, guztira bederatzi gol egin zituen, neurketan gehien, baina azkenean ezin izan zuen taldearen porrota saihestu. Hurrengo neurketan pentsatzen dira jada eibartarrak, larunbatean Urdulizen jokatuko duten Urduliz taldearen aurka, beraien ligako beste talde bat, hamairugarren bait dira armaginak baino bi puntu gutxiagorekin.
Somos Eibar taldeak balio asko dituzten bi puntu lortu zituen Beti-Onaki garaitu eta gero (30-24). Hasierako bien arteko kolpeek markagailua berdinduta zeukaten eta eibartarrek bi golen aldea lortu bazuten ere hamargarren minuturako, naparrak ez ziren kokildu eta berdintzea lortu zuten berriz. Baina kanpotarrek baloi asko galdu zituzten, huts egite ugari eta kontraeraso pila armaginentzat. Huts hoien eragile nagusiak, defentsa bikain bat eta Fuentes atezainaren gelditu handiak izan ziren. Kanporatua izan zen arren, neurketa zoragarria gauzatu zuen taldekideei garaipenaren bidea arinduz. Hala ere, Fernandoren mutilak presa zutela ematen zuen, kontraerasoak segiduan amaitzeko gogoarekin, eraginkortasuna jeitsiz. Interbidea, buruarekin jolastea zen, jokaldiak prestatuz eta horrek emaitza ematen bukatu zuen.
Atzean egindako lan bikain horri esker, taldeak, zortzi minututan bi gol besterik ez zituen jaso. Aurrean, arerioak beldurtzen jarraitzen zuen Mikel Zuloagak eta aurrean jartzen ziren guztiak gaindituz, goletan zenbaki bikoitzak lortu zituen beste jardunaldi batez, oraingoan 11 gol sartuz, taldeak baino heren bat baino gehiago. Gainera, bostgarren posturaino igo da ligan gol gehien sartu dituztenen sailkapenean, 98 eginda, batezbeste bost baino gehio, izugarria.
Denboraldiko lehen zatirik onenetarikoa izan zen eibartarren partetik, bost goleko aldearekin atsedenaldirako, irudi paregabe erakutsiz. Bide beretik hasi zen bigarren zatian, armaginak buru zirela, lau eta hutseko partziala lortu zuten zortzi minututan norgehiagoka bideratuz. Goraipatzekoa da berriro ere Ipuruako kiroldegiak erakutsi zuen sarrera, zaletuek taldea bultzatu zuten azken minuturaino animatuz eta urteko garaipenik garrantzitsuetariko batera eramanez. Ondo eutsi zioten mutilek azkeneraino eta bi puntuak poltsikoratu ondoren hamargarren posturaino igotzen dira beheko postuetatik zertxobait urrunduz.
Bi puntu oso garrantzitsu lortu zituen Somos Eibarrek larunbatean Urban Cabero Balonmano Barakaldo taldearen aurka (26-25) eta beheko postuetatik aldentzen dira armaginak. Talde indartsua bizkaitarra, oso garesti saldu zuten azala Ipuruan. Eibartarra izan ziren markagailuan buru egon zirenak neurketa ia gehienean, hiru lau aldeko aldea lortuz. Baina horiak ez zuten etsi eta atsedenaldira gol bakar bategaitik galtzen iritsi ziren.
Bigarren zatia ere bide beretik jarraitu zuen, eibartarrak aurretik eta barakaldarrak bat bi goleko errentarekin beti aurpegia emanez.. Eta hórrela heldu zen neurketa azkeneko txanpara, gol bakarreko aldea etxekoentzat eta penalti jaurtiketa kanpokoentzat, baina Mikel Guerrak penaltia geratu eta bi puntuak etxean utzi zituen. Nogehiagokako azkeneko bi golak ez zuten askorako balio eta armaginak garaile irten ziren. Eibartarrei kriston bultzada ematen dien garaipena dudarik gabe, zinez beharrezkoa eta etxean lortu behar diren puntuak derrigor zaletu bikain honek lagunduta.
Azkeneko lau neurketetan hirugarren garaipena eibartarrentzar. Orain momentuan Somos Eibar hamaikagarren da 15 punturekin, erdialdea puntu bakar batera duela eta azken aurrena, Egia taldea sei behetik. Datorren astean Zaragozara bidaiatu beharko dute Maristas taldea bisitatzeko.
Somos Eibar taldearen garaipen itzela larunbatean Jacar San Antonioren kontra (29-28). Asko landutako irabazia izan zen, batere erreztasunik gabe eta markagailuan atzetik joatea tokatu zitzaiona. Zazpi minuturen faltan aurretik jarri eta berehala hasitako bi taldeen arteko gol hartu emanak ziurgabetasun itzela eraman zuen Ipuruako armailetara bainan neurketari bukaera ezinhobea eman zioten eibartarrek, urtea ondo amaituz. Nabarmentzekoak izan ziren zaletuen animo eta bultzada, jendetza ez egon arren, inoiz baino gehio animatu zen eta hori nabaritu zuten jokalariak, nola nabaritu ere.
Lehen komentatu bezala, 53. minuturarte ez ziren aurretik jarri Fernandoren mutilak, markagailuan atoian, berriz aurreratzen ziren naparrak eibartarrak berdintzen lortzen zuten bakoitzean. Mikel Guerra atezainaren gelditu eta parte hatze on, Aitor Telletxearen eroaten eta gol pase harrigarri eta nola ez, Mikel Zuloagaren goleei esker, bederatzi larunbatean, markagailua irauli zuten, bi puntuak bereganatzen. Azken eraso baten aukera izan arren, kapokoek ez zuten aprobetxatu eta ezker zutoina ondo babestu zuen Mikel Guerrak ginga jarriz. Izen batzuk aipatu arren, ezin ditugu partidako besteak ahaztu behar. Guztira, eibartarren aldetik 10 jokalarik gol bat sartzea lortu zuten gutxienez. Sekulako taldea, sendoa, gogorra, maila gorazko edozein talderi aurre egiteko adinakoa.
Sailkapenean hamaikagerren bukatzen du urtea Somos Eibarrek beste horren beste punturekin, iaz baino bat gehiagorekin eta sentsazio hobeagoekin. Lehen itzulia bukatzeko neurketa bat falta den arren, eibartarren ligako Egia Eskubaloiaren aurka alajaina, baina hori gabonen ondoren izanen da, bitartean ospa ditzagun jaiak.
