Español 
TXAPELDUNAK. Hierros Servando Eibar taldeak Lehenengo Nazional mailako C multzoko liga titulua irabazi berri du, Beti-Onak nafarraren kantxan irabazi eta gero(30-32). Denboraldi ezin hobea burutu dute armaginek, bidean 12 puntu besterik ez dituzte utzi, 30 neurketatik 23 garaipen eskuratuz. Gainera, bigarren talderik goleatzaileena izan da eibartarra, Lander Casado buru dutela arlo honetan. Orain, Zilarrezko Ohorezko mailara igotzeko azken fasea jokatu beharko dute Fernandoren mutilek ekainean, denboraldi zoragarria borobiltzeko.
Asteburuko lehiara itzulita, joan etorriko lehia izan zen,erasoan fin aritu ziren bi taldeak, hala ere, kanpotarrak izan ziren aginte makila autoritate handiz eraman zutenak. “Neurketa parekatua izan zen, berdinketa askorekin. Kontzentrazioa galdu gabe jokatu genuela goraipatzea nahiko nuke, azken minutuetan batez ere”, adierazten du pozik eibartarren entrenatzaileak. Markagailuan aurretik uneoro, jokoan zutena kontuan hartuta, dena eman zuten gure jokalariek bi puntuak segurtatzeko. Arerioak ez zuen eze jokoan, baina aurpegia eman zuen 60 minututan, eibartarren jomuga kolokan jarriz. Hala eta guztiz, gure jokalariak ez ziren kikildu eta maisutasunez nagusitu ziren Atarrabian. “Beti-Onak, talde lehiakorra dela erakutsi zuten, denboraldi osoan zehar bezala eta horrek meritu gehiago ematen dio gure garaipenari, gogor lehiatu baitziren, eta horrek denoi mesede”, bukatzen du Fernandok. Etxeko Eneko Asuabarrena bilakatu zen norgehiagokako goleatzailerik onena 9 golekin; eibartarren aldetik, aldiz, Mikel Zuloaga izan zen onena 7rekin. Arrasatearrak lehengo maila berreskuratzea oso garrantzitsua izan daiteke igoera faseko 3 neurketetarako.
Urrea balio duen garaipena lortu zuen Hierros Servando Eibar taldeak igandean Distriplac San Antonioren aurka (27-26). Bigarren postua segurtatu dute eibartarrek, eta bide batez, igoera faserako txartela eskuratu. “Oso norgehiagoka estua eta emozioz beterikoa bizi izan da Ipuruan, asko geneukan jokoan eta oztopoak oztopo, taldeak irabaztea lortu du”, zioen Fernandok. Gainera, Helvetia Anaitasunak galdu egin zuen eta lidergoa bi puntutara dute armaginek. Kontuan hartu behar da ere bien arteko berdinketa egongo balitz, gipuzkoarrak geratuko liratekeela lehenak, aurten jokatu dituzten lehiak eta gero. Bi neurketa besterik ez dira geratzen txapelketa bukatzeko eta lehen helburua beteta, bigarrenaren bila irtengo dira eibartarrak.
Gogor borrokatu eta kostatako bi puntu izan ziren igandekoak. Jokoan zegoenaz jakitun, urduritasun puntu bat sumatu zen etxeko jokalarietan, hori bai, horri ere aurre eginda neurketa borobila burutu zuten armaginek, hala ere, sufritzea tokatu zen. Lehia oso parekatua izan zen, denbora guztian berdinketarekin elektronikoan. Hala eta guztiz, lehen zatiaren amaieran eta bigarrenaren hasieran, kanpotarrek hiru goleko partziala lortu eta bi goleko errenta edukitzea lortu zuten. Dena den, eibartarrek berehala irauli zuten markagailua eta hiru goleko aldea eskuratuta garaipena bideratu zuten. Baina urduritasun etsai, berdintzen utzi ziren eta azken hamar minutuetarako utzi zituzten etxeko-lanak armaginek. “Taldea 21-22 galtzen jarri denean, jokalariek eduki duten erreakzioa goraipatzea nahiko nuke. Kirioak lasaitu eta eraso eraginkorrak egin dituzte”. Horrela ba, eibartarrek itxiera bikaina eman zioten neurketari eta lehen helburua bete zen. “Zailtasunez beteriko denboraldi honetan eduki duten konpromiso eta gorputz eta arima aritzeagatik zoriondu nahi nituzke jokalariak”. Arrazoi osoa Fernando, lan bikaina mutilak. Ezina ekinez egina.
Hierros Servando Eibar taldeak ezin izan zuen behar zuen puntua atera Ereintza Aguaplasti eginiko bisitan (24-20). Gainera, sailkapenean aldea murriztea lortu zuten errenteriarrak eta 6 punturen faltan 5era aurkitzen dira. Hala ere, marjina nahikoa dute armaginek bigarren postuari eusteko, fidatu ezin diren arren, eskura dute helburua lortzea. Bestalde, gogoratu beharra dago, oraindik bi neurketa geratzen zaiela Ipuruan eta hori baliatu behar dute Fernandoren mutilak, Ipurua gotorleku bilakatu eta behar den puntua lortzea.
Asteburuko lehiara itzulita, gogor borrokatu zuten eibartarrek, hala eta guztiz, etxekoen defentsa gogorra gainditzen arazoak izan zituzten gure jokalariek. 20 gol besterik ez zituzten sartu; aitortu beharra dago tantu gutxiko norgehiagoka izan zela eta horrek etxekoen alde jokatu zuela. Lehen zati oso parekatua bizi izan zen Errenterian, dena den, armaginak atzetik markagailuan une oro. Berdintzea lortzen bazuten ere, berehala jartzen ziren aurretik etxekoak, ezin zuten markagailua irauli eibartarrak. Azken 10 minutuetako 5-2ko partzialak erabaki zuen lehia, bi puntuak Errenterian utzita. Mikel Zuloaga izan zen armaginen goleatzailerik onena 6rekin; etxekoen partetik Ander Arruti izan zen erasoan finena 6rekin ere.
11 neurketa eta gero galdu gabe iritsi zen Hierros Servando Eibar taldearen denboraldiko laugarren porrota Iruñean (28-25). Hori bai, liderraren kantxan izan zen eta gure jokalariek ez zuten amore eman neurketa osoan, gainera, bost minuturen faltan berdinketa zen markagailuan eta punturen bat harramazkatzeko zorian egon ziren eibartarrak. Hala ere, esku hutsik itzuli behar izan zuten armaginak, hori bai, itxura polita eman ondoren. Horrek, gure jokalariei motibazio puntu bat eman die hurrengo erronka konplikatuak aurrera ateratzeko. Bigarren da taldea 40 punturekin eta sailkapenean atzetik datozen arerioak denek irabazi bazuten ere, beraien aurkako norgehiagokek markatuko dute gure taldearen etorkizuna.
Ondo hasi zuten armaginek partida, lehen minutuetan aurretik jartzea lortu zuten gainera markagailuan, hala eta guztiz, etxekoek duten maila erakutsi eta buelta eman zioten emaitzari lehen zati osoan zehar aurretik igarotzeko. Baina Fernandoren mutilak ez ziren kikildu eta bigarrenaren hasieran berdintzea lortu zuten. Bien arteko hartu-emana egon zen hurrengo minutuetan, nafarrak aurretik batik bat, baina eibartarrak hurbil. Lehenago aipatu bezala, norgehiagoka bukatzear zegoela parekatu zuten kanpotarrek, puntuak eskuratzeko itxaropena berpiztuz. Dena dela, 5-2ko azken partzialak dena zapuztu zuen eta esku hutsik bueltatu ziren gureak.
Ondo banatu zituzten markatutako golak bi taldeko jokalariek, etxekoen aldetik Endika Andueza izan zen goleatzailerik onena bostekin, eta Jon Barruetabeña eibartarrena bostekin ere. Datorren asteburuan laugarren den Uharte izango da Ipuruan, beharrezko bi puntu ametzetan jarraitzeko.
11. neurketa galdu gabe jarraian Hierros Servando Eibar taldeak batu zuena larunbatean Alcorta Forging Group Elgoibarri Ipuruan irabazi eta gero (28-20). Nagusi izan ziren armaginak norgehiagoka guztian, sendo, momentutxo batean ahulezi puntua erakutsi bazuten ere, maisutasunez gailendu ziren gureak. Azken 11 partidetatik 10 irabazi ditu eta bestea berdindu talde armaginak, datu izugarriak ez bairik gabe.
Aginte makila ederki erabili zuten eibartarrek, lehia osoan markagailuan aurretik izanda. Egia da aldea handitzea kostatu zitzaiola taldeari hasiera batean, hala eta guztiz, ez zituzten bi puntuak arriskuan ikusi. Atzean fin aritu ziren armaginak 20 gol jasoz, 6 soilik bigarren zatian. Erasoan berriz, zorrotz, Lander Casado eta Ander Eizagirre bilakatu ziren norgehiagokako goleatzaile nagusienak 8 eta 6 golekin hurrenez hurren.
Bigarren da taldea orain 40 punturekin eta lehen postua bi puntura dute. Hirugarrena, aldiz, zazpi azpitik da, koltxoi bikaina ligako azken zatiari aurre egiteko. Txapelketako bigarren talderik goleatzaileena da eibartarra eta denboraldi bikainari erremate ezin hobea emateko bigarren leku horri eutsi beharko dio. “Egutegi oso zaila daukagu liga amaiera arte eta lanean gogor jarraitu behar dugu, lehiakorrak izan denbora guztian eta fidatu gabe jokatu”. Armaginen entrenatzaileak ondo dioen bezala, neurketa oso zailak datoz: Helvetia Anaitasuna, Uharte eta Ereintza Aguaplast dira hurrengo hirurak, hau da, lehen sailkatua, laugarrena eta hirugarrena hurrenez hurren. Hala eta guztiz, gure jokalariak prest daude erronkari ekiteko. “Hortaz aparte, ez dugu ezustekorik nahi geratzen zaizkigun neurketetan, horrela, %100ean bukaera arte borrokatu”, ondorioztatzen du Fernandok.
Igoera fasean sartzeko puntuak batzen jarraitzen du Hierros Servando Eibar taldeak eta jomuga geroz eta hurbilago ikusten dute gure jokalariek Estudio Matmata Zaragoza Ademarren kantxan berdindu eta gero (31-31). Egia da igandean gehiago merezi izan zutela eibartarrek, jaun eta jabe izan zirela bigarren zatian, hala eta guztiz, ez zuten lehia behar zen unean itxi eta aragoitarrek berdinketa lortu zuten azken momentuan. “Neurketak borobiltzen ikasi behar dugu eta arerioari aukerarik ez uzten. Hala ere, oso zail geneukan partida aurrera atera genuen, arerioaren zailtasuna eta pasa dugun aste txarra ikusita poztekoa. Gaixotasunek, lesioek eta lan kontuengatik izandako jokalari gabeziak min asko eman digu”.38 punturekin bigarren dira orain armaginak, lehen postua urrun duten arren, bigarrenari eusteko lan bikaina egiten ari dira ez bairik gabe
Dena dela, etxekoak izan ziren nagusi lehengo 20 minutuetan, batez ere erasoan. Ate aurrean fin aritu ziren espainiarrak kontraeraso bortitzak sortuz eta markagailuan aldeak zabalduz. Hala ere, atzetik bazoazen ere eibartarrek ez zioten neurketari aurpegia galdu eta zertxobait suspertu eta gero markagailua iraultzea lortu zuten atsedenaldira hiru goleko diferentziarekin iritsiz. “Sentimendu gazi-gozoarekin bueltatzen gara, bagenekigun lehia gogorra izango zela, gainera, hasieratik aldapa gora jarri zitzaigun defentsako balantze eskasa eta gero. Hala eta guztiz, markagailua irauli eta bost goleko errenta eduki eta gero dena gaizki irten zitzaigun azken partean, galtzeko arriskua ere hurbiletik ikusiz”. 4 minuturen faltan Axier Gisasolaren golak hiru goleko aldea eman zion eibartarrei, baina etxekoak finago aritu ziren azken momentuetan, akats gutxiago egin zituzten eta berdinketa lortu arte borrokatu zuten.
Mikel Zuloaga berriz bueltan dela argi geratu zen, norgehiagokako goleatzaileri onena bihurtu baitzen 10ekin. Lander Casado 7rekin eta Jon Barruetabeña 6rekin ederki lagundu zuten Mikel. Datorren asteburuan ez da liga jardunaldirik egongo aste santua dela eta.
Hierros Servando Eibar taldearen beste garaipen borrokatua eta landua Dominicos Zaragozaren aurka oraingo honetan, bederatzigarrena jarraian (27-25). Lehenengo zati parekatu baten ondoren, eibartarrek aldea zabaltzea lortu zuten, hala eta guztiz, minutu gutxiren faltan kanpokoak markagailuan hurbildu eta berdinketaren mamua Ipurua kiroldegitik pasa zen. “Gehiegi sufritutako beste etxeko garaipen bat”, aitortu zuen Fernando entrenatzaileak. Hori bai, armaginek duten adorea atera eta bi puntuak poltsikoratzea lortu zuten azken unean. Maila handiko norgehiagoka ikusi ahal izan zen larunbatean, borrokatua eta emozioz beterikoa. Bigarren jarraitzen du taldeak, hori bai, liderrak jokatzeke zuen azken neurketa irabazi eta hiru puntutara da jada.
Norgehiagoka estua espero zen eta iragarpen guztiak bete zituen lehiak. Lehen zatia bigarrena baino parekatuagoa izan bazen ere, puntu bat harramazkatzeko aukerak izan zituen kanpoko taldeak. “Erasoan errazago egin behar ditugu gauzak eta defentsan ezin dugu arerioei hainbeste jaurtiketa erraz utzi. Landu beharrekoa ezbairik gabe”, zioen Fernandok. Partida osoan hamar berdinketa egon ziren guztira, bien arteko berdintasunaren isla, eta eibartarrak aldentzen hasi zirenean bi puntuak ziur etxean geratuko zirela pentsatzen hasi ginen denok. Baina txuribeltzek ez zuten amore eman eta segundo gutxiren faltan gol batera jartzea lortu zuten. Orduan, armaginen azken erasoan Lander Casadok defendatzailea atzean utzi eta lasaitasunaren gola egin zuen. Norgehiagokako goleatzailerik nagusiena bilakatu zen Lander zazpirekin. “Neurketa hauek aurrera ateratzen ari bagara ere, etorkizunerako egoera aldatzea izan behar dugu helburu, horrela jarraitu ezkero nazioarteko talderik onenetarikoen aurka jokatuko dugu eta hango partidak erakutsitako joko honekin galdu egiten dira”.
