Urrea balio duen garaipena lortu zuen Hierros Servando Eibar taldeak igandean Distriplac San Antonioren aurka (27-26). Bigarren postua segurtatu dute eibartarrek, eta bide batez, igoera faserako txartela eskuratu. “Oso norgehiagoka estua eta emozioz beterikoa bizi izan da Ipuruan, asko geneukan jokoan eta oztopoak oztopo, taldeak irabaztea lortu du”, zioen Fernandok. Gainera, Helvetia Anaitasunak galdu egin zuen eta lidergoa bi puntutara dute armaginek. Kontuan hartu behar da ere bien arteko berdinketa egongo balitz, gipuzkoarrak geratuko liratekeela lehenak, aurten jokatu dituzten lehiak eta gero. Bi neurketa besterik ez dira geratzen txapelketa bukatzeko eta lehen helburua beteta, bigarrenaren bila irtengo dira eibartarrak. Gogor borrokatu eta kostatako bi puntu izan ziren igandekoak. Jokoan zegoenaz jakitun, urduritasun puntu bat sumatu zen etxeko jokalarietan, hori bai, horri ere aurre eginda neurketa borobila burutu zuten armaginek, hala ere, sufritzea tokatu zen. Lehia oso parekatua izan zen, denbora guztian berdinketarekin elektronikoan. Hala eta guztiz, lehen zatiaren amaieran eta bigarrenaren hasieran, kanpotarrek hiru goleko partziala lortu eta bi goleko errenta edukitzea lortu zuten. Dena den, eibartarrek berehala irauli zuten markagailua eta hiru goleko aldea eskuratuta garaipena bideratu zuten. Baina urduritasun etsai, berdintzen utzi ziren eta azken hamar minutuetarako utzi zituzten etxeko-lanak armaginek. “Taldea 21-22 galtzen jarri denean, jokalariek eduki duten erreakzioa goraipatzea nahiko nuke. Kirioak lasaitu eta eraso eraginkorrak egin dituzte”. Horrela ba, eibartarrek itxiera bikaina eman zioten neurketari eta lehen helburua bete zen. “Zailtasunez beteriko denboraldi honetan eduki duten konpromiso eta gorputz eta arima aritzeagatik zoriondu nahi nituzke jokalariak”. Arrazoi osoa Fernando, lan bikaina mutilak. Ezina ekinez egina.

11. neurketa galdu gabe jarraian Hierros Servando Eibar taldeak batu zuena larunbatean Alcorta Forging Group Elgoibarri Ipuruan irabazi eta gero (28-20). Nagusi izan ziren armaginak norgehiagoka guztian, sendo, momentutxo batean ahulezi puntua erakutsi bazuten ere, maisutasunez gailendu ziren gureak. Azken 11 partidetatik 10 irabazi ditu eta bestea berdindu talde armaginak, datu izugarriak ez bairik gabe. Aginte makila ederki erabili zuten eibartarrek, lehia osoan markagailuan aurretik izanda. Egia da aldea handitzea kostatu zitzaiola taldeari hasiera batean, hala eta guztiz, ez zituzten bi puntuak arriskuan ikusi. Atzean fin aritu ziren armaginak 20 gol jasoz, 6 soilik bigarren zatian. Erasoan berriz, zorrotz, Lander Casado eta Ander Eizagirre bilakatu ziren norgehiagokako goleatzaile nagusienak 8 eta 6 golekin hurrenez hurren. Bigarren da taldea orain 40 punturekin eta lehen postua bi puntura dute. Hirugarrena, aldiz, zazpi azpitik da, koltxoi bikaina ligako azken zatiari aurre egiteko. Txapelketako bigarren talderik goleatzaileena da eibartarra eta denboraldi bikainari erremate ezin hobea emateko bigarren leku horri eutsi beharko dio. “Egutegi oso zaila daukagu liga amaiera arte eta lanean gogor jarraitu behar dugu, lehiakorrak izan denbora guztian eta fidatu gabe jokatu”. Armaginen entrenatzaileak ondo dioen bezala, neurketa oso zailak datoz: Helvetia Anaitasuna, Uharte eta Ereintza Aguaplast dira hurrengo hirurak, hau da, lehen sailkatua, laugarrena eta hirugarrena hurrenez hurren. Hala eta guztiz, gure jokalariak prest daude erronkari ekiteko. “Hortaz aparte, ez dugu ezustekorik nahi geratzen zaizkigun neurketetan, horrela, %100ean bukaera arte borrokatu”, ondorioztatzen du Fernandok.

Hierros Servando Eibar taldearen beste garaipen borrokatua eta landua Dominicos Zaragozaren aurka oraingo honetan, bederatzigarrena jarraian (27-25). Lehenengo zati parekatu baten ondoren, eibartarrek aldea zabaltzea lortu zuten, hala eta guztiz, minutu gutxiren faltan kanpokoak markagailuan hurbildu eta berdinketaren mamua Ipurua kiroldegitik pasa zen. “Gehiegi sufritutako beste etxeko garaipen bat”, aitortu zuen Fernando entrenatzaileak. Hori bai, armaginek duten adorea atera eta bi puntuak poltsikoratzea lortu zuten azken unean. Maila handiko norgehiagoka ikusi ahal izan zen larunbatean, borrokatua eta emozioz beterikoa. Bigarren jarraitzen du taldeak, hori bai, liderrak jokatzeke zuen azken neurketa irabazi eta hiru puntutara da jada. Norgehiagoka estua espero zen eta iragarpen guztiak bete zituen lehiak. Lehen zatia bigarrena baino parekatuagoa izan bazen ere, puntu bat harramazkatzeko aukerak izan zituen kanpoko taldeak. “Erasoan errazago egin behar ditugu gauzak eta defentsan ezin dugu arerioei hainbeste jaurtiketa erraz utzi. Landu beharrekoa ezbairik gabe”, zioen Fernandok. Partida osoan hamar berdinketa egon ziren guztira, bien arteko berdintasunaren isla, eta eibartarrak aldentzen hasi zirenean bi puntuak ziur etxean geratuko zirela pentsatzen hasi ginen denok. Baina txuribeltzek ez zuten amore eman eta segundo gutxiren faltan gol batera jartzea lortu zuten. Orduan, armaginen azken erasoan Lander Casadok defendatzailea atzean utzi eta lasaitasunaren gola egin zuen. Norgehiagokako goleatzailerik nagusiena bilakatu zen Lander zazpirekin. “Neurketa hauek aurrera ateratzen ari bagara ere, etorkizunerako egoera aldatzea izan behar dugu helburu, horrela jarraitu ezkero nazioarteko talderik onenetarikoen aurka jokatuko dugu eta hango partidak erakutsitako joko honekin galdu egiten dira”.

Balore handiko bi puntu lortu zituen Hierros Servando Eibar taldeak larunbatean Erromo Indupimerien aurka, markagailua azken minutuetan irauli eta gero (26-23). Ez zen armaginen denboraldiko neurketa onenetarikoa izan, hala eta guztiz, indarra, adorea eta kalitatea atera zuten jokalariek puntuei eusteko. ”Ikusten denez azken partidetan, asko kostatzen zaigu etxean irabaztea,baina garrantzitsuena jokalariak duten dena ematen dutela eta hori da gakoa helburuak lortzeko orduan”, zioen Fernando entrenatzaileak. Lehen postuan jarraitzen dute eibartarrak, Helvetia Anaitasuna puntu bakarrera eta bi partida gutxiagorekin atzetik dutelarik. Bi taldeen arteko berdintasunak lehia osoan iraun zuen arren, ia denbora guztian bizkaitarrak izan ziren aurretik markagailuan, aginte makila ederki eramanaz. Aurretik heldu ziren atsedenaldira eta lehen zatian zehar hiru lau goleko aldea ere izan zuten kanpotarrek.Eibartarrak aldiz, ezinean aritu ziren momentu batzuetan, atzetik une oro, ezin zuten zekiten jokoa eskaini. Alabaina, zerbaitetan bereizten badira gure jokalariak, porrota garesti saltzen dutela da. “Bagenekien partida zaila izango zela, azpitik egon gina markagailuan denbora guztian, baina taldeak ez zuen amore eman eta sufritzen jakin zuen. Goialdean bukatzeko gogoa eta konpromisoa erakusten dute horrela jokalariak”. 50 minutu nahiko kaxkarrak jokatu zuten armaginek. Bi gol azpitik heldu ziren azken 10 minutuetara, hala eta guztiz, itxura aldatu eta 9-4ko partzialari esker, emaitzari buelta eman eta bi puntuak eskuratzea lortu zituzten. Bost minuturen faltan berdinketa zen markagailuan, orduan, eibartarrek defentsa zorroztu eta Ander Ballesterosen geldituei golei esker aldea zabaltzea lortu zuten. “Ander Ballesteros goraipatzea nahiko nuke, oso fin aritu baitzen azken minuetetan 6 metroko gelditu ugari eginez. Baita Landerren lana azpimarratzea nahiko nuke ere erasoan egindako lanari esker min hartuta bazen ere”. Norgehiagokako goleatzailerik onena Erromoko Yailan Hechavarria izan bazen ere 7rekin, ezin izan zuen Hierros Servando Eibarren garaipena saihestu. Etxekoen aldetik Lander Casado eta Jorge Ecenarro izan ziren erasoan eraginkorrenak bakoitza 6 golekin. Erreakzio bikaina ez bairik gabe.